Прыкметнае для Добрушчыны ад 10 чэрвеня розных гадоў
1948 год
Растранжырваюць зярно
Цяжка, вельмі цяжка старшыні праўлення калгаса «Новае жыццё» Крупецкага сельсавета Аляксандру Бондараву супакоіцца тым, каб не дапусціць у сваёй дзейнасці што-небудзь такое, якое ідзе ў разрэз з інтарэсамі грамадскай гаспадаркі і Статутам сельскагаспадарчай арцелі. Прывабнасць пажывіцца за грамадскі кошт, выпіць за разбазараныя прадукты ці зярно так і прымушаюць яго пайсці на злоўжыванні.
Чарговая махінацыя была прароблена нядаўна. З калгаснай кладовай старшыня праўлення прадаў за значную цану 16 кілаграмаў зярна грамадзяніну Сямёнаву. «Выручку» Бондараў разам з другімі «віднымі» асобамі калгаса… прапілі ў той жа дзень…
К. Шустаў
1959 год
Не марудзіць з нарыхтоўкай сіласу
…Да апошняга часу ў калгасах сілас выкарыстоўваўся ў асноўным малочнай жывёле, нормы нарыхтоўкі яго былі вельмі нізкія. На зімоўку жывёлы ў 1955 – 1956 годзе ў сярэднім на адну карову было нарыхтавана па 2,6 тоны сіласу, таму і сярэдні надой на карову ў 1956 годзе быў нязначны – 1247 кілаграмаў.
Па 4,6 тоны на карову было нарыхтавана сіласу на стойлавы перыяд 1957 – 1958 года. Сярэдні надой у 1958 годзе складаў ужо 1801 кілаграм на 1 карову.
Калгасам нашага раёна ўстаноўлена заданне па закладцы сіласу ў колькасці 108,465 тоны.
П. Жураўлёў,
галоўны заатэхнік райсельгасінспекцыі
1981 год
У пошуку творчым
Аляксандр Ягоравіч Яўменаў на фабрыцы «Герой працы» з’яўляецца механікам рамонтна-механічнага цэха, абслугоўвае папераробчыя машыны. Нядаўна ў жыцці Аляксандра Ягоравіча адбылася радасная падзея – за працоўныя поспехі ён узнагароджаны ордэнам Кастрычніцкай Рэвалюцыі.
Механік рамонтнага цэха з’яўляецца лепшым рацыяналізатарам фабрыкі. Яго распрацоўкі заўсёды накіраваны на павышэнне прадукцыйнасці працы, эканомію сыравіны і матэрыялаў, стварэнне лепшых умоў працы для рабочых.
Два гады выкарыстоўваецца стацыянарны з’ёмнік для дэмантажу рабочых колаў насосаў папераробчых машын. З дапамогай гэтага механізму рамонтнікі значна скарачаюць тэрмін абслугоўвання машын. Ад выкарыстання навінкі атрымана 2 тысячы рублёў эканоміі…
М. Васільеў
