У аддзеле ідэалагічнай работы і па справах моладзі райвыканкама паведамілі, што з 1 па 15 снежня па Добрушчыне пракоціцца хваля перадсвяточных пазітыўных трансфармацый.
– Раённы агляд-конкурс для арганізацый мае на мэце, па-першае, завяршэнне Года добраўпарадкавання на прыгожай кропцы, па-другое, даць магчымасць землякам рэалізаваць асабістыя ідэі аб самых чароўных, неардынарных, трэндавых дэкарацыях, – удакладніла спецыяліст аддзела Юлія Ларчанка. – Усяго плануецца адзначыць пераможцаў у трох намінацыях: «Лепшае навагодняе афармленне прылеглай тэрыторыі», «Лепшае навагодняе ўнутранае ўбранне», «Лепшае навагодняе афармленне ўваходнай групы».
Дарэчы, першымі ўдыхаюць навагоднюю атмасферу ў свае аб’екты кропкі гандлю. Чакаем, што з кожным днём такіх кампазіцый у горадзе і сельскай мясцовасці будзе ўсё больш.
Для ўдзелу ў конкурсе патрэбна запоўніць заяўку, выслаць яе і 1–3 фота на электронную пошту аддзела з апісаннем сваёй кампазіцыі.
Творчае спаборніцтва напярэдадні зімовых святаў арганізавалі і ў раённым Палацы культуры. Дабрушан просяць узяць у рукі падручныя матэрыялы і стварыць скульптуру Снягуркі. Яна павінна быць аб’ёмнай, ад 25 сантыметраў «ростам». У астатнім для ўдзельнікаў – поўны карт-бланш.
– Абяцаем, што кожны стваральнік арт-аб’екта атрымае ад нас падарунак – білет на святочны мюзікл, – падкрэсліла дырэктар установы Раіса Мядзведзева. – Дэдлайн – 15 снежня. Давайце ствараць маленькую казку разам!
