Не клікалі, не чакалі, а жнівень паціхеньку пужае дабрушан прыкметамі восені. Зжаўцелымі лістамі, што пачынаюць сыпацца пад дрэвы, ранішнімі росамі і вяртаннем з летняга небыцця бацькоўскіх чатаў. Адны хваляцца, што ўжо цалкам сабралі сваіх дзяцей, іншыя – што толькі плануюць адправіцца ў магазіны і на школьныя базары.
Што выбіраюць дабрушане: збірацца ў апошнія дні перед вучобай ці зрабіць усё загадзя і не хвалявацца напярэдадні лінейкі, высвятляў «ДК».
Вольга МЕЛЬНІКАВА, старшыня раённай прафсаюзнай арганізацыі работнікаў АПК:
– У мяне трое дзяцей: меньшы яшчэ ходзіць у садок, а старэйшыя – школьнікі. Канцтавары трэба купляць на ўсіх. Акрамя гэтага неабходны адзенне, абутак, ды і партфелі маім вучням дзявятага і дзясятага класаў патрэбны новыя.
Зыходзячы з таго, што траты чакаюцца немалыя, рыхтавацца да школы пачала хіба што не з чэрвеня. Не паверыце, але на сённяшні дзень засталіся ў спісе пакупак толькі дробязі. Аднаму – рабочыя сшыткі, іншаму – спартыўныя штаны. А таксама яшчэ трэба заплаціць за падручнікі. Зробім гэта – і можна чакаць свята ведаў.
Людміла ГАЛАГАНАВА, палявод:
– Хаця мае дзеці ўжо выраслі, тэма збораў у школу актуальна для мяне і цяпер. Вядома ж, дапамагаю купляць школьныя тавары для ўнукаў. У асноўным гэта фінансавая падтрымка, але і параду магу выказаць.
Асабліва гэта патрэбна, калі мы ездзім са старэйшым, дзевяцікласнікам Дзмітрыем, на школьны базар у Гомель. Хлопчык на нямодныя рэчы не згадзіцца, а я, як бабуля, магу падказаць з боку якасці матэрыялу, практычнасці рэчаў, больш зручнага дызайну.
Ларыса ТРАЦІННІКАВА, прадавец у сельскім магазіне:
– Сабраць да новага навучальнага года траіх хлопцаў ой як няпроста, таму яшчэ ў працэсе. Другакласнік Аляксей хоча новы ранец. Аляксандр, што будзе вучыцца ў 4-ым класе, таксама просіць партфель. Вось і думаю: купіць два новыя, ці толькі старэйшаму, а малодшы яшчэ год вытрымае?
Школьная форма – асобная гісторыя. То абяцаюць насіць выключна варыянты оверсайз, то згодны на больш традыцыйныя рэчы па фігуры. Хтосьці думае, што толькі дзяўчынкі прыдзірлівыя ў плане трэндаў і брэндаў. Але, мяркуючы па маім вопыце, хлопцы таксама любяць модна апранацца.
