Смеццявозы ад «Магілёўтрансмаша», падраздзялення холдынга МАЗ, якраз напярэдадні прыгналі ў раён. Набылі іх часткова за лік аператара другасных матэрыяльных рэсурсаў, а таксама за сродкі бюджэту раёна, пераведзеныя ў статутны фонд камунальнага прадпрыемства.
Як патлумачыў механік «Добрушскага камунальніка» Дзмітрый Балюноў, транспарт ужо зарэгістраваны і хутка адправіцца па маршрутах горада. Таксама на ім будуць працаваць работнікі Церахоўскага філіяла.
– Зона ахопу – увесь раён, – удакладніў суразмоўнік. – Абнаўленне парка тэхнікі шыкоўнае. Аўтамабілі задняй загрузкі разлічаны на еўракантэйнеры, якія мы выкарыстоўваем. А ў канструктыўным плане ў новыя смеццявозы вытворцы дадалі мноства сучасных дэвайсаў. Напрыклад, на рулі ёсць гучная сувязь, іншая карысная электроніка. Таксама ў кабіне стаіць камера задняга віду, што зручна для вадзіцеля і бяспечна для работы яго калег.
Дарэчы, гэтыя машыны разлічаны на трох чалавек – вадзіцеля і двух грузчыкаў. За адзін раз яны змогуць перавезці бытавога смецця ці лістоты, сабранай на суботніку, больш за сем тон. Уражваючую лічбу прывёў Дзмітрый Балюноў.
Ён упэўнены, што навінкі, набытыя ў Год добраўпарадкавання, выдатна паслужаць «Добрушскаму камунальніку» на працягу ўсёй пяцігодкі якасці і надалей.
