Галоўная палітычная падзея снежня – Усебеларускі народны сход – усё бліжэй. Толькі ўчора адбылося пасяджэнне Прэзідыума на чале з кіраўніком краіны. У дабрушан ёсць і асабістыя прапановы, якія палепшаць наша жыццё. Меркаванні пачулі журналісты «ДК».
Мікалай ПРАКАПЕНКА, пенсіянер:
– Мне хацелася б звярнуцца да народнага веча з прапановай рабіць новыя мікрараёны ў населеных пунктах больш утульнымі, прадумваць іх інфраструктуру з улікам перспектывы. Напрыклад, наш мікрараён Меліяратар. Пабудавалі шматкватэрныя дамы, а побач з імі няма ні сквера, ні пляцоўкі для сямейнага адпачынку.
І яшчэ важная акалічнасць: куды пайсці гуляць моладзі, каб не ездзіць у цэнтр Добруша? Так, ёсць стадыён, але падлеткаў там бачу нячаста. У краіне жыць маладым, таму мая пазіцыя: будуйце ў горадзе больш аб’ектаў пад іх запатрабаванні.
Юрый ДРАЗДОЎ, электрамеханік:
– У цэлым, жывём мы добра. Медыцына ў раёне нармальная, работа ёсць, на адсутнасць канцэртаў ці мерапрыемстваў таксама не наракаю. Але, калі задацца пытаннем паляпшэння нашага быту, хацелася б крыху адрэгуляваць цэны на некаторыя тавары. Напрыклад, у сецевых магазінах крупы, масла, садавіна танней. Мне гэта падабаецца. Адэкватны кошт. А завітаеш у некаторыя гандлёвыя кропкі – цэннік вышэй, па кішэні б’е. І не возьмеш тое, што хочаш.
Таксама можна падумаць пра тое, каб адкрываць у невялікіх гарадах, па тыпе нашага, спецыялізаваныя магазіны. Думаю, кніжны Добрушу б не пашкодзіў. Як і магазін сувеніраў, цацак, айчыннай бытавой тэхнікі.
Яўгенія КУЗЬМЕНКА, інструктар па працоўнай тэрапіі:
– На мой погляд, істотнае пытанне рэспубліканскага значэння – захаванне прыродных багаццяў. У нас ёсць рака Іпуць, добрушская славутасць. Хацелася б, каб людзі больш акуратна адносіліся да чысціні на берагах, да месцаў адпачынку каля вады, на гарадскіх пляжах.
І колькі яшчэ ёсць патэнцыялу ў гэтым напрамку. Можна зрабіць на востраве сапраўдны цэнтр прыцягнення жыхароў і турыстаў: прыдумаць туды неардынарныя лавачкі, скейт-парк, павільён для гульні ў шахматы, як у гомельскім парку.
І яшчэ ідэя: чаму б у нас не пусціць невялічкі турыстычны параходзік? Водная экскурсія па ўнікальных пейзажах Добруша і раёна. Было б выдатна!
Аляксей ШЫЛЕЦ, памочнік ляснічага:
– Мяне турбуе пытанне будоўлі жылля для моладзі. Лічу, што і ў іншых рэгіёнах Беларусі маладыя спецыялісты, сем’і сутыкаюцца з гэтай праблемай. І яшчэ факт: калі ты толькі працуеш у раёне, а прапісаны, напрыклад, у Гомелі, то стаць у чаргу на атрыманне кватэры можаш толькі там. А калі мне падабаюцца мая работа і калектыў, хочацца застацца тут працаваць і надалей?
На мой погляд, асабісты кут, як матыватар для замацавання моладзі на першых працоўных месцах, мог бы сыграць. Прынамсі, мой аднагодка дакладна б задумаўся, ці варта ехаць у сталіцу, калі тут ёсць і стабільны заробак, і ўласнае жыллё.
Фота Яўгена УСЦІНАВА
