На вітрынах гандлёвых кропак ДФЗ па ўсёй краіне ўжо красуюцца талеркі, кубкі ды іншыя тавары, ад якіх вее духам самага душэўнага і сямейнага свята.
Каб прадэманстраваць усё і адразу, маркетолаг прадпрыемства Таццяна Уладзімірава расчыняе перад журналістамі раёнкі дзверы выставачнай залы. На асаблівым стэлажы – посуд з ялінкамі, цацкамі, шышкамі ды ляснымі жывёламі.
– Святочны посуд – тэма асаблівая, – падкрэсліла суразмоўніца. – Яго набываюць, каб упрыгожыць сваё ўрачыстае застолле і на падарунак родным. У дызайнах мы прытрымліваліся думкі аб тым, што рэч павінна выглядаць прыгожа, трэндава.
Самая вялікая з навагодніх калекцый фарфоравага завода называецца адпаведна – «Свята». У ёй каля пятнаццаці прадметаў: ад стандартных талерак для другіх страў да мініяцюрных падставак для пакецікаў гарбаты. Аднаго набору хопіць, каб арганізаваць багаты навагодні стол.
Таксама спецыяльна для аматараў сімвала будучага 2026 года – каня – спецыялісты з Добруша выпусцілі калекцыю з гэтымі высакароднымі жывёламі.
– Звярніце ўвагу на кубкі, – папрасіла Таццяна Уладзімірава. – Аб’ём – 430 мілілітраў. Вялікія і ўмяшчальныя. Гэта просьба нашых пакупнікоў, якую яны выказвалі прадаўцам магазінаў. Мы пажаданне пачулі і выканалі. Бо перад Новым годам і Раством усе мары павінны здзяйсняцца.
