Першы па намалоце ў гаспадарцы, першы ў раёне і трэці ў вобласці. З такім вынікам сёлетняе жніво завяршыў камбайнер сельгаспрадпрыемства «Калінінскі» Мікалай Варганаў.

–Трэці год запар намалочваю больш за дзве тысячы тон, – кажа механізатар. – Такую мэту ставіў і на гэтае жніво. Сёлета дасягнуў яе ў тандэме з памочнікам Віктарам Бужанам. Працавалі на адрэналіне. Калі выязджаю на камбайне ў поле, нібыта ўключаецца спартыўны запал.

У «Калінінскім» Мікалай 12 год. Доўгі час адказваў толькі за апрацоўку глебы. Дарэчы, на «Кіраўцы» ён працягвае працаваць, калі завяршаецца жніво.

Кар’еру камбайнера распачаў з яркай перамогі. На рахунку механізатара ўжо нямала сур’ёзных узнагарод. Сярод іх – удзячнасць міністра сельскай гаспадаркі за шматгадовую добрасумленную працу ў галіне.

Сёлетняе жніво камбайнер называе самым дажджлівым на сваёй памяці. Аднак і гэта не перашкодзіла планам: ён намалаціў 2558 тон збожжа. Частку – дапамагаючы суседзям-аграрыям. –

Уборка хлеба, як і ўвесь працэс яго вырошчвання, – цяжкая праца. Толькі ад мяне самога залежаць яе вынікі. Ад таго, наколькі сумленна падрыхтую камбайн і які набяру тэмп працы. Такая гонка мяне задавальняе, – кажа камбайнер.