Нехта з вялікіх выказаўся: у паняцця «хутка» вельмі доўгі тэрмін. На жаль, для людзей даверлівых гэта ісціна часам ператвараецца ў славутыя граблі, на якія тыя час ад часу наступаюць. І якія нязменна лупяць легкадумцаў па цемечку або самым балючым месцы.
На такі вывад выклікае крымінальная гісторыя, аб якой днямі паведамілі праваахоўнікі.
Галоўны фігурант яе – непрацуючая дабрушанка Наталля А. Тое, што гэта жанчына, дарэчы, маці двух непаўнагадовых дзяцей, не абцяжарвае сябе высокамаральнымі паводзінамі і бязгрэшнай адказнасцю перад нашчадкамі і знаёмымі ёй людзьмі, сведчыць яе «паслужны спіс». Дык вось, у свае 37 год яна паспела некалькі разоў пасядзець за кратамі за махлярства і крадзяжы. Словам, рэцыдыў.
– У чарговы раз вярнуўшыся мінулай восенню з месцаў пазбаўлення волі, дзе з 2018 года адбывала пакаранне за здзейсненыя злачынствы, дабрушанка нядоўга атрымлівала асалоду ад свабоднага жыцця, – патлумачыў следчы па асабліва важных справах РАСК Яўген Лук’янцаў. – Заміж таго, каб зрабіць з перажытага разумныя вывады, жанчына зноў стала на звыклую слізкую сцяжынку гульні з законам…
За некалькі месяцаў знаходжання Наталлі А. на волі ў ходзе расследавання новаўзбуджанай крымінальнай справы аб махлярстве ўстаноўлена 15 супрацьпраўных эпізодаў, дзе прайдзісветка іграла «першую скрыпку».
Спынімся на адным, які для характарыстыкі асобы маладой дабрушанкі з’яўляецца надзвычай паказальным. Дык вось, вярнуўшыся з месцаў не столькі аддаленых у Добруш, Наталля А. зачасціла ў адну з аптэчных устаноў райцэнтра. Па выпрацаванай гадамі звычцы, каб дабіцца прыхільнасці аптэкараў, пусціла ў ход свае абаяльнасць і больш – «акцёрскія» здольнасці.
У адных выпадках, выказваючы аптэкарскім работнікам просьбу выдаць ёй напавер лекавыя сродкі, імітавала ўласную хваравітасць і крайнюю немач. У другіх – у дадатак да просьбы даць лекаў на «вексель», «ляпіла» вобраз «забітай» смуткам маці. Маўляў, цяжкахворым дзеткам без гэтых таблетак ды сіропаў ніяк на ногі не падняцца.
Падчас, па сведчанні пацярпелых, Наталля А. увогуле балансіравала на мяжы кашчунства, прыкідваючыся цяжарнай. Магчыма пры гэтым і жывот надзімала для большай пераканаўчасці. Аптэкары ж – людзі не з жалеза. Спагадлівыя і міласэрныя. Верылі жанчыне і задавальнялі просьбы «пакутніцы». У выніку шляхам падману за чатыры месяцы махлярка запазычыла лекаў на суму 1146 рублёў. Неаднаразова яна звярталася і непасрэдна да загадчыцы аптэчнай установы з прамой, як лом, просьбай – пазычыць пэўную суму грошай. Калі ашуканкай заняліся праваахоўнікі, прыватны доўг аказаўся яшчэ больш важкім – 1355 рублёў...
– Зразумела, што, атрымліваючы напавер грошы і лекі, Наталля А. клялася, што ўсё запазычанае будзе вернута даўжніком у поўным аб’ёме і своечасова, – заўважае Яўген Лук’янцаў. – Пры гэтым сама была пераканана, што адзінае ў гэтым выпадку, што яна можа зрабіць, гэта сагрэць добрадушных людзей абяцанкамі…
Частка атрыманага нячэсным шляхам у ашуканкі давялося адабраць. Што адметна ў гэтай гісторыі: па інфармацыі супрацоўнікаў РАСК, ёсць факты, калі частку лекаў, пазычаных на лячэнне «небяспечных» для cябе і блізкіх хвароб, махлярка неўзабаве перапрадавала сваім знаёмым. А на выручаныя грошы набывала спіртное і закуску.
Упэўнены, у следчым ізалятары, дзе зараз знаходзіцца арыштаваная па абвінавачванні ў махлярстве дабрушанка, у яе будзе час паразважаць аб сутнасці быцця.
Дарэчы, кола пацярпелых ад круцелькі – немалое. Сярод такіх – некалькі гараджан, якіх Наталля А. зманам угаворвала купіць для яе ў крамах нятанныя і менш каштоўныя тавары. Як заўсёды, «шчыра» абяцаючы вярнуць даўгі. Цалкам і не адкладваючы іх «у доўгую скрыню»…
