Экспазіцыю суправадзілі цытатай з верша Аляксея Недагонава «Из одного металла льют медаль за бой, медаль за труд». Мерапрыемства прымеркавалі да свята Кастрычніцкай рэвалюцыі.
– Працоўны подзвіг не менш значны, чым баявы. І мы не павінны забываць людзей, дзякуючы якім прадпрыемства дасягнула сённяшняга ўзроўню развіцця, – звярнуўся да ўдзельнікаў невялікай урачыстасці намеснік дырэктара прадпрыемства Аляксандр Мартынаў.
Залатая зорк а Героя Сацыялістычнай працы, ордэн Працоўнага Чырвонага Сцяга, ордэн «Знак пашаны», ордэн Леніна, медаль «За працоўныя заслугі » . Гэтыя высокія ўзнагароды нашы землякі атрымалі ў розны час і на розных пасадах. Герой Сацыялістычнай працы Анатолій Падрэзенка, напрыклад, прыйшоў на прадпрыемства адразу пасля заканчэння рамеснага вучылішча. І адпрацаваў тут усё жыццё. Яго брыгада пастаянна перавыконвала пяцігадовы план.
Захар Фралоў, кавалер ордэна Леніна, кіраваў цэлюлозна- кардонным камбінатам «Герой працы» ў 1952 – 1965 гадах. Якім ён быў як дырэктар і чалавек, прысутным расказаў ветэран фабрыкі Уладзімір Гутараў і ўспомніў некалькі яркіх эпізодаў:
– Аднойчы я згубіў свой пропуск і не змог своечасова трапіць на працоўнае месца. Захар Іванавіч выклікаў мяне ў кабінет і паказаў, як ён захоўвае свае дакументы. Тую параду ўзяў на ўзбраенне. Былі і іншыя выпадкі, у якіх праявіліся яго шчырасць, справядлівыя адносіны і чалавечая спагада.
Сваё меркаванне наконт ідэі, якую ажыццявілі на прадпрыемстве, выказаў старшыня ветэранскай арганізацыі фабрыкі Аляксандр Каржоў.
– Добрую справу зрабілі, – адзначыў ён. – Такія людзі вартыя таго, каб пра іх ведалі, іх шанавалі. Гэта найлепшы прыклад для моладзі, якая толькі пачынае свой працоўны шлях.
