Звечарэла не высокі дом на вуліцы Касманаўтаў у Добрушы ўтульна вітае святлом у вокнах. А вось і сам гаспадар: Уладзімір адчыняе веснічкі, гасцінна запрашае ў пакой.
Час, калі бацька вяртаецца з працы , самы жаданы і доўгачаканы для ўсёй сям’і. Першым звычайна насустрач бяжыць найменшы яе прадстаўнік – двухгадовы Мікіта. У хлопчыка заўсёды ёсць важныя навіны і сур’ёзныя пытанні да таты. Не паспеў адказаць, як сярэдні сын – першакласнік Максім – бярэ за руку: час гуляць у піратаў. Дачакаўшыся сваёй чаргі, дачка-трэцякласніца Ангеліна прыносіць сшытак з хатнім заданнем па беларускай мове:
– Мама праверыла, але некаторыя словы яна не ведае.
Аказалася, Уладзімір і яго жонка Таццяна – ураджэнцы Украіны. На малой радзіме яны пазнаёміліся і закахаліся. Абставіны склаліся так, што маладая сям’я змяніла месца жыхарства і краіну.
– У Добруш ехалі ўдваіх, а зараз нас пяцёра, – расказвае гаспадыня дома. – Адчуваем тут сябе спакойна і ўпэўнена. Цяпер мы грамадзяне Беларусі, лічым яе роднай. Усё тут падабаецца, адзінае, з чым пакуль адчуваю цяжкасці, – беларуская мова.
Наогул, кажуць шматдзетныя бацькі, іх школьнікі самастойна рыхтуюцца да ўрокаў і без напамінкаў выконваюць свае абавязкі па доме. Прыбраць свае рэчы, засцяліць ложак, памыць посуд, пакарміць коцікаў, куранят, сабачку і не забыць пра чарапашку ў акварыуме… Больш за ўсё ім падабаецца дапамагаць бацьку з будаўнічымі справамі. У доме, якім сям’я абзавялася пасля жыцця ў інтэрнатах, Уладзіміру хочацца стварыць максімальны камфорт. Прычым, сваімі рукамі. Жонка і дзеці па магчымасці дапамагаюць. Умелы гаспадар памяняў вокны, зрабіў у калідоры гардэробную – адзення шмат, а гаспадыня любіць, каб кожная рэч была на сваім месцы.
– Паглядзіце, які адмысловы туалетны столік вырабіў муж па маёй просьбе! – Таццяна запрашае нас у спальны пакой.
А дзеці тым часам хваляцца сваёй прасторай – яркай і зручнай для кожнага: тата пастараўся.
– Хаця вольнага часу недастаткова, – кажа Уладзімір, – імкнуся ўдзяляць увагу сваім родным. Хвіліны, праведзеныя з сям’ёй, самыя каштоўныя для мяне.
Блізкія людзі і ўласны дом – тое, што аднаўляе сілы напрыканцы насычанага дня, большасць якога Уладзімір праводзіць за клопатам аб пацыентах, ён – памочнік урача агульнай практыкі, загадчык Дубоваложскага фельчарска-акушэрскага пункта. Таццяна да дэкрэтнага водпуску працавала на фарфоравым заводзе. Дарэчы, яна сама са шматдзетнай сям’і, таму, калі даведалася, што стане мамай у чарговы раз, вельмі абрадавалася.
– А я адчуў сябе бацькам, як толькі Таццяна паведаміла пра сваю цяжарнасць, – расказвае Уладзімір. – Нараджэння дачушкі чакаў з хваляваннем, і вось такі падарунак – 1 студзеня, на Новы год, Ангеліна з’явілася на свет.
Не менш жаданымі былі для яго і нараджэнні сыноў. Гэта, кажа мужчына, яго надзея, апора і прадаўжэнне.